تصريح خاص لموقع كواليس الكرة اللبنانيةمع اللاعب محمد صادق بعد الفوز الثالث للنجمة على نادي شباب الساحل
إعداد: تيا وهبي
عبّر لاعب نادي النجمة محمد صادق عن سعادته بالفوز الثالث على التوالي للفريق، والذي جاء على حساب نادي شباب الساحل بنتيجة 3–1، ليتصدر النجمة ترتيب الدوري مؤقتًا بـ9 نقاط.
وقال صادق:
«أولًا، أكيد الفوز مهم ليترجم مجهودنا وانتصاراتنا بالمباراتين السابقتين، يلي كانوا صعبين مع الصفاء والأنصار. واليوم قدرنا نأكد هالمجهود ونحقق الفوز الثالث على التوالي، وهو فوز معنوي كبير لإلنا، خاصةً بوجود جهاز فني جديد ومدرب جديد عم نحاول نتأقلم معو بسرعة لنفهم الخطة كمجموعة وفريق. فهالثلاث انتصارات مهمين كتير ليخلونا نكون بالصدارة».
وعن مستواه الشخصي وأداء الفريق، أضاف:
«عم حاول دايمًا قدّم أفضل ما عندي وساعد المجموعة ورفقاتي ولبّي كل شي عم يطلبو مني المدرب بأرض الملعب. وبنفس الوقت، كل يوم بحاول أكون أفضل وأتطور أكتر. اليوم الفريق كان مسيطر من البداية، وشخصية نادي النجمة كانت واضحة وقوية بأرض الملعب».
وختم صادق برسالة لجمهور النجمة:
«بدي أتشكّر الجمهور على وجودن ودعمن لإلنا خلال أول ثلاث مباريات، وهالشي بيعني كتير لإلنا. بهديهن هالفوز الثالث، وإن شاء الله القادم أجمل، وهدفنا نفرّحهن ونحقق كل شي بدن ياه، وإن شاء الله نختم مرحلة الذهاب متصدرين بالعلامة الكاملة».