السلام عليكم انا احمد مكي اللي كنت عم سوق باص الطلاب مبارح قبل مباراة فريقنا الغازية ضد نادي البرج انا لاعب بفريق الغازية و قبل ما كون لاعب كنت مشجع و بفتخر كون شوفير او عتال او حتى اجمع كرات للنادي هيدي بلدتنا و فخرنا و عزنا اما بالنسبة للناس اللي تنمرت و استهزئت بنادينا كرمال امكانياتنا المادية بدي خاطب عقولهم المريضة انت بتعرف انو نادي الغازية باقل الميزانيات عم يلعب درجة اولى هيدا بحد ذاته انجاز و الميزانية اللي عنا اذا بتعطيها لأي فريق بلبنان اكيد ما بتشوفه الا درجة تالتة و رابعة نحن جماعة منحب بلدتنا ومنحب اللعبة وبأقل الامكانيات بدنا نلعب اولى بس يكون في فريق احسن مننا بالدرجة الاولى صحتين على قلبه الغازية بلدة كروية قدمت للكرة اللبنانية افضل لاعبين على مر العصور (كابتن فؤاد ليلا،مالك حسون..الخ..) قدمتهم مش بالمال قدمتهم من رحم المعانات شوفوا كل واحد المعناة و الظروف اللي عاشها لوصل و قدم افضل ما عنده من اجل الكرة اللبنانية انت اللي عم تتمسخر وين عايش ؟؟ كلنا هون بلبنان وهيدا بلدك هيك ما في اهتمام بكل القطاعات مش بس كرة القدم و في تقصير و سرقات و فساد و ما رح نتحسن ابداً اذا رح يضل في هيك عقول مريضة.
#الفقر_مش_عيب
التسميات
دوري الدرجة الأولى